Xanana ema kaer. Pak Try, Xanana Sudah Saya Tangkap
Pak Try, Xanana Sudah Saya Tangkap
“Pak Try, Xanana sudah saya tangkap. Apakah bisa saya selesaikan, Pak?” kata Theo kepada Try Sutrisno.
“Sik, sik, sik…, mengko tak telepon (Nanti…, nanti…, saya telepon lagi),” kata Try Sutrisno, setengah gugup sambil menutup teleponnya.
Sitasaun diálogu entre Panglima Komando
Pelaksana Operasi (Pangkolakops) Timor-Timur (Tim-tim), Letjen TNI
(Purn.) Theo Syafei ho Panglima ABRI Jenderal Try Sutrisno wainhira
kaptura Xanana Gusmão iha Suku Lahane Osidentál, Sub-distritu Díli
Osidentál, iha (Sesta) 20 Novembru 1992. Iha lorokraik ne’e kedas,
komitiva Panglima ABRI Try Sutrisno to’o kedas iha Díli hodi halo
investigasaun no halo diálogu ho figura Xanana ne’ebé deskonfia sai
“kakutak” ba Trajedia 12 Novembru 1991 iha Rate Santa Cruz Díli.
Ba Theo Syafei no Try Sutrisno, kaptura
Xanana nu’udar vitória ida ba sira na’in rua no ba nasaun Indonézia.
Katak, sira na’in rua nia susesu kaptura Xanana, bele sai vitória ida
hodi lori sira na’in rua ba kaer fitun—bele hetan promosaun diviza
ne’ebé ás tebes. Maibé, ba timoroan sira, kaptura Xanana nu’udar derrota
ida ne’ebé halo “luta ba ukun rasik-án” ne’e sai biuk tiha. Katak,
inimigu sira kaptura ona Xanana entaun Timor-Timur mós ema kaptura ona
sai provínsia 27 hodi integra totál ba Indonézia nia ukun.
Xanana ninia kapturasaun halo ema wa’in
sai bulak. Hosi Portugal, Prezidenti Mario Soares eziji ONU hodi husu ba
Indonézia atu liberta Xanana. Simpatizantes Fretilin ema 150 inklui
Xanana nia oan mane Nito (idade 21) no Zenilda Gusmão (idade 18) iha
Austrália, halo demo hasoru Konsuladu Indonézia iha Melbourne atu
liberta Xanana hosi kapturasaun ne’e. Xanana ninia espoza Emília
(momentu ne’e halo idade 41) mós husu atu liberta Xanana tanba Xanana
la’os kriminozu polítika. “Ha’u husu atu Austrália bele ajuda ha’u nia
laen ninia libertasaun, atu nune’e ema labele trata nia hanesan
kriminozu polítika ida,” dehan Emilia.
Xanana monu iha inimigu nia liman laran,
Sesta (20 Novembru 1992), iha membru polísia ida nia uma iha Lahane
Osidentál, Kopral Satu Agusto Pereira, iha uma ho metru 80 kuadradu ne’e
besik militár Indonézia 632 sira nia baraka ho metru 30 de’it. Iha uma
laran ne’e, fatin Xanana subar bá, halo ho forma letra “L” ho nia kle’an
metru ida. Xanana nia naran hahú famozu iha tinan 1978 hafoin troka
Nicolau Lobato nu’udar komandante FALINTIL. Iha tempu Portugés, Xanana
nu’udar jornalista iha “A Voz de Timor”, Nia kaer rubrika “drama” no
“poezia”. Tanba nia nu’udar poeta ida ne’ebé sempre krítika estadu no
governu Portugal, maka A Voz de Timor ema lori ba tribunál no hetan
multa 30.00 escudo. Hafoin ne’e, Xanana harii mesak jornál ida ho naran
“Nakroma”.
Lahatene loos! Karik, iha konspirasaun
polítika iha Xanana nia kapturasaun ne’e ka la’e, Try Sutrisno só bele
hetan de’it promosaun diviza no hetan biban sai vise prezidenti no Theo
Syafei so bele de’it hato’o lia-loos kona-ba Xanana ne’e liu-hosi ninia
livru “Tidar Bhakti Tiada Akhir”. “Livru ida ne’e maka ko’alia kona-ba
Xanana nia kapturasaun. Tempu ona ha’u atu hato’o lia-loos kona-ba
Xanana,” dehan eis Panglima Kodam Udayana, Theo Syafei. Nune’e ka
lanune’e, oras ne’e Xananq sai tebes líder nasionál ne’ebé karismátiku
no sai mós lider ezemplar nasaun seluk iha rai-rai. Hein katak, hanoin
hikas tinan 23 (20 Novembru 1992—20 Novembru 2015) ema kaptura Xanana
ne’e, Xanana bele kaptura no liberta povu Timor-Leste hosi mukit no tauk
ida atan nian. (Cassimata)
Komentar