MarVi Fila Hikas Mai Timor
MarVi Fila Hikas Mai Timor
Aban, Kinta (05/01/2017),
artista timor-oan, Maria Vitória (MarVi) ne’ebé durante fulan rua (2)
resin ba tuir konkursu múzika dangdut iha Indonézia fila hikas mai
Timor-Leste (TL).
Informasaun ne’e fó sai ofisialmente
hosi Sekretáriu Estadu Juventude Desportu (SEJD) Leovirgilio Hornai
hamutuk ho artista nasionál sira liu hosi konferénsia emprensa ne’ebé
hala’o iha edifísiu SEJD Lesidere Díli, Kuarta-Feira (04/01/2017).
“Ohin ita hakarak anúnsia ka fó sai ba
públiku katak, aban (05/01/2017) oras tuku ida (13:00) oras Timor-Leste
nian, ita nia alin, artista MarVi sei mai iha Timor,” dehan SEJD,
Leovirgilio Hornai iha konferénsia emprensa ne’e.
Leo esplika katak, objetivu hosi MarVi
mai Timor-Leste atu komprimenta no agradesse ba família bo’ot MarVi
nian, no mós ba povu no komunidade sira ne’ebé durante iha audisi
Dangdut Academy Asia 2 (DAA2) iha Timor-Leste ne’ebé hetan suporta hosi
ETO+ no mós grupu ka organizasaun artista nian hodi sira bele ba
partisipa iha DAA2 ne’ebé hala’o iha Indonézia no fó sai hosi kanal
televizaun nasionál INDOSIAR.
Iha biban ne’e, reprezentante família
MarVi nian, Padre Thiago Soares hateten, MarVi ba tuir kompetisaun ne’e
hanesan ba kuda ho matan-been, no sai ho haksolok. Tan ne’e MarVi la
mesak maibé nia ba hosi odamaatn bo’ot uma lisan Timor nian.
No hosi família agradesse ba Maromak,
Estadu Timor-Leste, no mós partes hotu-hotu, inklui eis Primeiru
Ministru kay Rala Xanana Gusmão ne’ebé ba marka prezensa iha Indonézia,
SEJD no mós partes hotu-hotu.
Entretantu, ho partisipasaun MarVi nian
durante fulan hirak nia laran iha DAA2 hanesan orguillu bo’ot ba
Timor-Leste, liu-liu artista timor-oan sira tanba maske foin primeira
vez partisipa iha eventu ne’e, MarVi konsege kompete ho nasaun seluk no
okupa iha kuartu (4°) lugar. No konsege halakon reprezentante hosi
nasaun haat (4) seluk hanesan, hosi Malázia, Singapura, Brunei Darusalam
no Thailand, hafoin lakon ho reprezentante uma na’in Indonézia. (Jon)
Komentar